Таяу Шығыстағы шиеленістің өршуіне байланысты Президент Қасым-Жомарт Тоқаевтың тапсырмасымен Қазақстанның тиісті мемлекеттік органдары Ливаннан қазақстандықтарды және олардың отбасыларын елге эвакуациялау жұмыстарын ұйымдастырды, деп хабарлайды alataunews.kz Сыртқы істер министрлігіне сілтеме жасап.
Эвакуация операциясы Ыстамбұл және Дубай қалалары арқылы жүзеге асырылып, 2024 жылғы 17-31 қазан аралығында Бейруттан Астана мен Алматы қалаларына 41 адам аман-есен жеткізілді.
Бұл шара әскери қақтығыс аймағында қалған Қазақстан азаматтарының қауіпсіздігін қамтамасыз ету және олардың құқықтары мен мүдделерін қорғау мақсатында қолға алынды.
Айта кетсек, жақында Израиль әскері Ливанда «Хезболла» тобының жоғары лауазымды өкілі Имад Әміхазды тұтқындаған болатын. Әміхазды ұстау операциясын Израильдің теңіз күштері жүзеге асырды. Израиль тарапы оны «Хезболланың» теңіз операцияларына жауапты деп есептейді. Ливан үкіметі бұл оқиғаға қатысты БҰҰ-ға шағым түсіретінін мәлімдеді.
«Хезболла» радикал тобы 7 қазаннан бері Израильге шабуылдарын үдетіп, ХАМАС-ты қолдауға бағытталған әрекеттерін жалғастыруда. Осыған жауап ретінде Израиль Ливанның оңтүстігінде «Хезболлаға» қарсы әскери операциялар жүргізіп келеді.
