«Алматы облысында 2021 жылы егін жұмыстарына барлығы 29,5 мың тонна дизель отыны бөлінді. Ал оның 15,3 мың тоннасы (51,8%) ғана игерілді. Шамамен алғанда 50% игерілмей қалып тұр. Неге? Мәселенің себебі неде? Дизельді жеткізіп беруге уағдаласқан оператор оны нарық бағасымен сатады. Оңтүстік Қазақстанда осындай заңбұзушылық фактілері тіркелген. Ал жеңілдікпен берілетін дизель отыны мен нарықтағы дизель отынының бағасында біршама айырмашылық бар (кейде 25 тг болуы мүмкін)», — деді Ғалымжан Байбосынов.
Облыстық ауыл шаруашылығы басқармасы басшысының орынбасары Қоюмчан Омаровтың айтуынша, мұндай жағдайлардың орын алуының түрлі себептері бар. Мысалы, ұсыныс жазғанда, бір шаруашылық жүгері егемін десе, кейін ұсыныстағы дизель отыны кеп қойған соң, шығыны аз дүние егемін деп, дизельге мұқтаж болмай қалады.
«Екіншіден, дизель отынын оператор белгілі бір жерге әкеліп құйып кетеді, шаруашылықтар сол жерден өздерінің ұсыныстары бойынша отынды тасып алуы керек. Алайда, оны тасымалдау үшін бензин таситын көлік жалдау мәселесі шығады, сосын, тонналап отынды құйып алатын заты болмайды. Сондықтан, артық бас қатырғанша, нарық бағасымен отынды керек уағында жақын жердегі бекеттерден сатып алады. Кейде, тіпті, жеңілдікпен берілген дизельден арзан бағаға отын табылады. Нарынқолда демеушілер табылып, 192 теңгеден емес, 186 теңгеден отын сатып алған кездері болған», — дейді Қоюмчан Омаров.
Облыстық ауыл шаруашылығы басқармасы осындай түсініспеушіліктер туындамау мақсатында шаруашылықтарға нарық бағасымен дизель отынын сатып алуға мүмкіндік беру керектігін айтты. Және шаруашылықтарға дизель отынына байланысты субсидия бөлу арқылы жеңілдік жасауды ұсынды. Сондай-ақ, Қоюмчан Омаров аталған мәселені шешу үшін талондық немесе карталық жүйені енгізуге болатынын атап өтті.
