Ауданда тұрғындарға медициналық көмек көрсететін 31 мекеме бар. Айта кету керек, жергілікті денсаулық сақтау саласы кегендіктердің көңілін көншітпейді. Аудандағы денсаулық сақтау объектілерінің 90%-дан астамы тозған. Сонымен қатар арнайы маман дәрігерлер жетіспейді. Ал нәресте өлімі 1,6 есеге көбейген. Биыл Қарқара ауылында бір ауысымда 30 адам қабылдайтын фельдшерлік-акушерлік пунктың құрылысы аяқталады.
«Ауыл – ел бесігі» жобасы шеңберінде А. Нүсіпбеков ауылында бір ауысымда 30 адам қабылдайтын дәрігерлік амбулатория салынып жатыр. Сондай-ақ, орталық аудандық аурухана ғимаратына, Жалаңаш ауылындағы ауылдық ауруханаға және Тоғызбұлақ ауылындағы дәрігерлік амбулаторияға күрделі жөндеу жұмыстары жүріп жатыр. Шыбышы, Тұйық, Жалаулы және Бөлексаз ауылдарында жыл аяғына дейін блокты-модульды медициналық кешендер орнатылады, бұл мақсатқа 200 млн. теңге бөлінді.
Облыс басшысы Марат Сұлтанғазиев аудандағы медицина саласын дамыту үшін болашақта нақты жобалар жасалатынын айтты.
