Оның айтуынша, Үлкен Алматы каналының төңірегінде шешімі табылмаған түйін көп. Соның бірі, аталған филиалдың «Алматы су» мекемесімен ортақ келісімге келе алмауы. Егер «Алматы су» мекемесі олардың ұсыныстарын қабыл алса, онда 14708 га суармалы жерді сумен қамтамасыз етуге мүмкіндік туады. Және тағы бір мәселе, суға байланысты жобаларды жүзеге асыру үшін филиалға белгілі бір нормативтік-құқықтық актілердің қабылдануы керек.
«Үлкен Алматы каналын басқаруда ортақ оператор қажет. Бұл жерде біз Қызылорда қаласының Әмудария, Сырдария өзендерін пайдаланудағы тәжірибесіне сүйене отырып әрекет етуге тиіспіз. Өздеріңіз білетіндей, бұл канал Еңбекшіқазақ, Талғар, Қарасай және Жамбыл аудандарының суармалы жерлеріне су береді. Ал қазіргі таңда біз жұмыс жасайтын 15 әлеуметтік-кәсіпкерлік корпорацияның 80 миллион теңге берешегі бар», — дейді филиал директорының орынбасары.
Облыс әкімі оның айтқан мәселелерін тыңдай келе, әкімнің орынбасарына Қызылорда қаласына іс-сапармен барып, ондағы жұмыстың қалай жүргізіліп жатқанын көріп келуге және аталған мәселелер бойынша хаттама толтыруға тапсырма берді.
