«Құрылыс 2023 жылдың наурыз айында басталып, осы айдың 10-ына дейін аяқталады деп жоспарланған. Жобаның жалпы құны 858 миллион теңгені құрайды. Мердігер компания СП NEFT ЖШС, қазіргі уақытта құрылыс алаңында 30-дан астам жұмысшы еңбек етіп жатыр», — деп атап өтті Райымбек ауданы құрылыс бөлімінің басшысы Көлбаев Айдын.
Өнер мектебі Мұқағали Мақатаевтың туған жерінде, өнер майталмандары мен өнерге жақын адамдар көп шоғырланған Қарасаз ауылында салынып жатыр. Бұрынғы өнер мектебінің ғимараты ескіріп, апатты жағдайға жеткендіктен, жаңа мектеп салу қажеттілігі туындады. Қарасаз ауылында 2000-нан астам тұрғын бар.
«СП NEFT компаниясы құрылыспен 30 жылға жуық уақыт айналысып келеді. Қазір ғимараттың ішкі жұмыстарының 90 пайызы аяқталған, тек әрлеу жұмыстары ғана қалды. Мектеп тамыз айының ортасында пайдалануға беріледі деп күтілуде», — деді Қарасаз өнер мектебінің құрылыс жұмыстарындағы тікелей басшысы Әкімқожа Бағлан.
Жаңа өнер мектебі ауыл тұрғындары мен жас өнерпаздарға үлкен мүмкіндіктер бермек.
