«Көрсеткіштер бізде мұнай өнімдері бар екенін дәлелдеп тұр. Сонымен қатар санитарлық қорғау тарапынан да сынама алды. Олар қазір тексеріп жатыр. Нәтижесі шыққанда салыстырып, ластауыш көзін тапқаннан кейін тиісті шара қолданылады», – дейді СҚО экология департаментінің басшысы Азамат Бектасов.
«Ромашка» саяжайының тұрғындары соңғы кездері құдықтағы бау-бақша суаратын судың өңі өзгеріп, иістеніп кеткенін айтып шу шығарған.
Тіпті 10 метр тереңдіктен алынатын су тұтанғанда қорқып кеткен. Өйткені суға шоқ тисе жарылыс бола ма деп қауіптенді. Тұрғындар су құрамында мұнай қалдығы болуы мүмкін екенін әрі ол жақын маңдағы жанармай құю бекетінен келгенін меңзеген.
Бірақ жанармай станциясының басшылығы өздеріне шаң жуытпай қойған. Дегенмен халықтың күдігі расталған. Суға жанармай немесе дизель араласқан.
Мамандар оның қайдан пайда болғанын тез арада анықтауға кірісті.
