Облыс әкімдігінің мәліметінше, қылмысқа қатысы бар, бұрын сотталған 38 жастағы күдікті ұсталып, қамауға алынды. Оның үстінен кәмелет жасына толмаған қыз баланы зорлау және өлтіру дерегі бойынша қылмыстық іс қозғалды.
«Полиция тарапынан тергеу амалдары жүріп жатыр. Қылмысын мойындаған күдіктіге заң аясында қатаң жаза қолданылатын болады», – деп хабарлады әкімдіктен.
Ал, жекелеген әлеуметтік желілерде қыз баланы ұлты басқа бірнеше азамат зорлап өлтірген деген ақпарат шындыққа жанаспайды.
«Бұл жерде ұлтаралық мәселенің де еш қатысы жоқ. Қазір Панфилов ауданында жағдай тұрақты. Облыс әкімшілігінің, құқық қорғау органдарының бақылауында», – деді Жетісу облысы әкімінің баспасөз қызметінің басшысы Думан Қырықбаев.
Еске салсақ, бұған дейін Жаркент маңындағы Шолақай ауылында 15 жастағы қызды жергілікті тұрғынның зорлап, содан кейін өлтіргені туралы ақпарат тарады.
