Жәрмеңкені ұйымдастырудағы негізгі мақсат — жұмыс берушілер мен бітіруші түлектер арасында еркін диалог алаңын қалыптастыру, нарықтағы сұранысқа ие мамандықтарды анықтап, соның негізінде мамандар даярлау. Мұндай жәрмеңке жыл сайын университет қабырғасында әртүрлі форматта өтеді. Жәрмеңке нәтижесінде бітіруші түлектер өздеріне керекті жұмыс орындарымен танысып, жұмысқа орналасады. Жыл сайынғы өткен жәрмеңке нәтижесінде университет түлектерінің 95 пайызы жұмыспен қамтылды.
Бүгін өткізілген жәрмеңкеде университеттің бірінші проректоры Бекенова Лидия Молдабайқызы шараға келген жұмыс берушілерге алғыс айтып, студенттерді мансап жолындағы алғашқы қадамдарымен құттықтап, университет түлектерін жұмыспен қамтуға арналған жобалар туралы айтты. Іс-шарада Алматы қаласы, Алматы облысынан бөлек, алыс аймақтардан келген жұмыс берушілерге сөз беріліп, жұмыс орындары туралы баяндауына, өз мекемелері туралы ақпарат беруіне мүмкіндік берілді. Бос орындар жәрмеңкесіне қатысушы жұмыс берушілерге 2024 жылы бітіретін түлектер туралы ақпаратты “Педагогика, бизнес және құқық” институтының директоры Нурлихина Гүлмира Болатқызы таныстырды.
Оқу орнында дәстүрлі түрде өткізіліп отыратын жәрмеңкеге 40-тан астам мекеме қатысты. Олардың қатарында орта білім беру ұйымдары, мектепке дейінгі білім беру ұйымдары, жекеменшік білім беру ұйымдары, өндірістік және сатумен айналысатын компаниялар бар. Іс-шараға қатысқан жұмыс берушілер тарапынан 400 бос жұмыс орны ұсынылды. Жәрмеңкеге келген мекемелер бітіруші түлектермен ашық сұхбаттасып, өз кезегінде жұмысқа қабылдайтыны туралы мәлімдеді.
