«Бізге әкімдік бұл жобаны сеніп тапсырып отыр. Кез келген қиындыққа қарамай, ірі жобаларды жүзеге асырамыз. Бірақ, Талғарға келсек, ол жерде жекеменшік иеліктегі жер учаскелері кедергі болып тұр. Оны жергілікті билік шешсе, біз ертеңнен бастап жұмыс істеуге дайынбыз», — дейді «Констракшн Груп» компаниясының вице-президенті Аббас Шахин.
Айта кетейік, Талғар мен Алматы арасында қатынау жергілікті жұрт үшін үлкен мәселеге айналған. Тұрғындармен кездесу кезінде облыс басшысы Марат Сұлтанғазиев электр пойыз жолын салуды қолдайтынын айтқан. Бүгін ол Талғар қаласы әкімі мен Алматы облыстық жолаушылар көлігі және автомобиль жолдары басқармасы басшылығына осы жобаны жүзеге асыруға кедергі болған мәселелерді шешуді тапсырды.
