Ауылдағы 688 оқушы әртүрлі мектептерде оқуға мәжбүр. Себебі отыз жылдық тарихы бар мектептегі күрделі жөндеу жұмыстары уақытылы аяқталмаған. Құрылыстың бітетін түрі жоқ. Былтыр тамызда жөндеу жұмыстарын бастаған мердігер компания, басында жұмысты сәуірде аяқтайтындарын айтса, кейін мамырдың соңына дейін созуды сұраған. Бірақ ата-аналар нысан жаңа оқу жылында да ашылмайды ма деп қауіптенеді.
«Мектептегі жөндеу жұмыстары бір жылдан бері жүріп жатыр. Сәуір айының соңына дейін барлық жұмыстар аяқталады деп күттік. Жақында жөндеу жұмыстары тағы созылатынын естідік», — дейді ауыл тұрғыны.
Тұрғындар жөндеу жұмыстарының сапасыздығын айтып та шағымданды.
«Бәріміз осы мектепте оқыдық, қазір немерелерім оқиды. Мектепте жөндеу жұмыстары жүріп жатқандықтан, балаларды үш түрлі мектепке апаруға мәжбүрміз. Қыста қиын болды, таксилетіп жүрдік. Жөндеу жұмыстарының сапасы жақсы болады деп сенгіміз-ақ келеді, алайда сапасыз жасалып жатқанын байқап жүрміз. Мынаны қараңыздар, мектепке кіре беріс жол қисық, төмен», — дейді тағы бір тұрғын.
Еңбекшіқазақ ауданы білім бөлімінің бастығы да жөндеу жұмыстарына көңілі толмайтынын, жұмыс өте баяу жүріп жатқанын айтады.
— «Біз қазір бір жылдан бері жөндеу жұмыстары жүріп жатқан мектепте тұрмыз. Мектеп 1000-нан астам оқушыға арналған, бірақ қазір 600-ден астам оқушы бар. Жұмыс жүріп жатыр, аяқталу мерзімі 2024 жылдың 30 сәуірі. Бірақ мердігер компания тағы бірнеше ай сұрап тұр, өйткені белгіленген мерзімде аяқтай алмайтындарын айтады. Біз бұған келіспейміз, ата-аналар да қарсы. Олар да жұмыстардың жедел аяқталуын және балалардың осы жалпы білім беретін мекемеге ауыстырылуын талап етіп отыр», — дейді білім бөлімінің бастығы Арайлым Төлеубекова.
Бұл жағдайға мердігер компания да пікір білдірді.
«Жұмыстың уақытында бітпеуіне ауа райы қатты әсер етті. Қатты суық кездері жұмыс істей алмағандықтан, уақытында бітіре алмадық. Басқа нысандарымызда мұндай жұмыстар тоқтатылды. Қалған жұмыстарды мамыр айының соңына дейін аяқтауға уәде береміз», – дейді мердігер компания өкілі Нұрлан Қадырбеков.
Сырттан қарағанда жұмыстың 85 пайызға аяқталғанғандай көрінеді. Яғни, мектептің қасбеті мен маңайындағы әрлеу жұмыстары қалған. Ал ішіне кіргенде жасалуы керек жұмыстар көп екені байқалады.
Облыс әкімі Марат Сұлтанғазиев құрылысы сағызша созылған мектепке жауапты мердігерлер уәде еткен мерзімде шаруаны аяқтамаса, оларға қатысты тиісті шара қолданылатынын ескертті.
