Маманның айтуынша, емдеу жолы беймәлім аутизмге шалдыққан балалардың саны жыл санап артып келеді. Баланың бойынан байқалатын аурудың бірінші белгісі – қарым-қатынас қабілетінің болмауы. Сондай-ақ, бала зер салмаса, есімін атағанда қарамаса, эмоциясын көрсетпесе,ата-ана мұны дабыл деп қабылдау керек. Мұндай қылықтарды баланың бойынан 1,5-2 жасында аңғаруға болады. Егер осындай белгілер байқалса, мамандарға жүгінген дұрыс.
«Қазіргі таңда аутизмге шалдыққан 391 бала, 6 ересек адам тіркеуде тұр. Бұл ретте «Қамқорлық» бағдарламасы аясында Жамбыл және Еңбекшіқазақ аудандарында ерте араласу және оңалту орталығы жұмыс істейді. Былтыр аутизмге шалдыққан 15 бала оңалтудан өткен. Бұдан бөлек, Талғар ауданында орналасқан «Облыстық психикалық денсаулық орталығы» жанынан аутизмге арналған қосыша кабинет ашу жоспарлануда», — деді Райгүл Тленова
Райгүл Тленова аутизм диагнозы қойылған балалар қоғам және мемлекет қолдауына мұқтаж екенін, бүгінде БҰҰ шешіміне сәйкес, 2008 жылдан бастап 2 сәуір күні аутизм туралы ақпарат тарату күні аталып өтетінін айтады.
