ҚР АШМ мәлім еткендей, Әбілхайыр Тамабек картоп өсірумен айналысатын шаруашылық мамандарымен кездескен. Кейін Нидерланд компаниясының өкілдерімен бірге азық-түлік кәсіпорындары салынуы мүмкін жерлерге ат басын бұрған.
Сапар соңында вице-министр Жетісу облысының әкімі Бейбіт Исабаевпен және «Farm Frites Kazakhstan» ЖШС басшысы Йозеф Боермен кездесті. Қос тарап Қазақстанда картоп индустриясын дамыту жөніндегі жоспарларын талқылап, болашақта зауыт салынуы мүмкін жерлер туралы өз ойларын ортаға салды.
«Жоба жүзеге сәтті асырылатын болса, картоп өндіретін шаруашылықтар саны көбеюі қажет. Осыған орай, 10 000 гектар алқапта картоп өсіру бойынша жобаны ұйымдастыру жоспарланып отыр. Сонымен қатар, инвестициялар туралы келісім жасасу мүмкіндігі қарастырылып жатыр. Онда барлық тараптың әлеуметтік-экономикалық міндеттемелері реттеледі және «Farm Frites» компаниясының фри картоп зауытын салу кезіндегі мемлекеттік қолдау шаралары нақты белгіленеді», — делінген министрлік хабарламасында.
Айта кетейік, «Farm Frites» (Farm Frites Beheer B. V.) компаниясының өкілдері 5 жылдан астам уақыт бойы Қазақстанның бірқатар өңірінде картоп отырғызумен шұғылданып келеді. Олар жоғары сападағы картоп өндіруді және зауыттың қажеттіліктері үшін керек көлемдегі картопты жеткізуді көздеп отыр. Сондай-ақ жергілікті фермерлерді оқыту да компанияның жоспарында бар.
