Бақташы малды жайылымнан айдап бара жатқанда, тапа-тал түсте қаңғыбас иттер бір отар қойға шабуыл жасаған. Оқиға ауылдың дәл ортасында жақын маңдағы тұрғын үйдің қақпасының тұсында болды.
Жергілікті билік апта сайын қаңғыбас иттер ұсталатынын, алайда мәселе әлі шешілмей тұрғанын айтады.
«Тұрғындардың қаңғыбас иттерді аулау туралы өтініштеріне үнемі жауап береміз. Жауапты қызметтер кейде аптасына бірнеше рет келеді. Бірақ барлық иттерді бақылай алмаймыз. Ауылдық жерде бұл қашанда қиын», – дейді Әйтей ауылдық округі әкімінің орынбасары Әкімжан Жүнісов.
Әкімдіктегілер көбінесе қаңғыбас иттер шын мәнінде иесінің қарауынсыз қалған жабайы үй иттері екенін айтады. Осы айдың өзінде бірнеше тұрғынға иттерін дұрыс ұстамағаны үшін айыппұл салынып, ескертулер жасалып үлгерді.
Ауыл тұрғындары иттер тұтас бір табынға шабуыл жасаса, адамға да шабуыл жасайды деп қорқады. Оның үстіне, осыған ұқсас оқиға бірнеше ай бұрын болған. Баланы ит тістеп алып, оған медициналық көмек көрсетілген.
