Үкімет басшысының айтуынша, су тасқыны мәселелерін бақылауда ұстауға тікелей өңір әкімдері жауапты.
«Өңір әкімдері су тасқыны мәселелерін жеке бақылауда ұстауы тиіс. Бұл орайда Төтенше жағдайлар министрлігінің үйлестіруші рөлі өте маңызды. Министрлік жыл сайын «Көктем» республикалық командалық-штабтық оқу-жаттығуында су тасқыны кезеңіне дайындықты тексереді. Барлық өңірлер су тасқынына толық дайынбыз деп баяндайды. Ал сайып келгенде тұрғындар мен су басқан ғимараттар және инфрақұрылым зардап шегеді. Яғни, бұл оқу-жаттығулар формалды түрде өткізілетінін, ал дайындық қағаз жүзінде ғана қалатынын көрсетеді», — деді Олжас Бектенов бүгінгі Үкімет отырысында.
Үкімет басшысы Төтенше жағдайлар министрлігіне оқу-жаттығуды өткізу форматын қайта қарауды тапсырды.
«Көлемді судың келетін күні алыс емес. Осыған байланысты Төтенше жағдайлар министрлігі әкімдіктермен бірлесіп, арнайы және инженерлік техниканы шоғырландырып, бизнес техникасын резерв ретінде пайдалану туралы келісімге келуі керек, аса қауіпті учаскелер маңында қажетті материалдар қорын жинауы қажет. Көлік қатынасы үзіліп қалуы мүмкін елді мекендерді алдын ала айқындап, ондағы азық-түлік пен дәрі-дәрмектің қажетті қорын дайындаған жөн», — деді О. Бектенов.
Сонымен қатар, Ақпарат министрлігімен бірлесіп халыққа су тасқыны қаупі және эвакуациялау кезіндегі әс-қимыл туралы уақытылы хабардар етіп отыру керек екенін ескертті.
«Ақпарат министрлігімен бірлесіп, бүгіннен қалдырмай халықты су тасқыны қаупі, су басу және эвакуациялау кезіндегі іс-қимыл ережелері туралы кеңінен хабардар ету жұмыстарын бастау қажет. Халықпен нақты кері байланыс орнатып, олардың көмек көрсету туралы өтініштері бірден қаралуы тиіс. Көлік министрлігі жолдар мен көпірлер жағдайына тәулік бойы мониторинг жүргізсін. Жолдарды су шайып кеткен жағдайда, оларды жедел қалпына келтіру бойынша барлық қажетті шаралар қабылдансын», — деді Премьер.
