Ведомство өкілдерінің мәліметінше, елімізде жылдың басынан бері 550 мың адам Щучинск — Бурабай курорт аймағына барған. Бұл өткен жылмен салыстырғанда 2 есе көп.
Жазғы маусымда 240 мыңға жуық адам Шымбұлаққа барды. Бұл былтырғы жазғы маусымға қарағанда 90 мыңға артық. Дегенмен нақты көрсеткіштер маусым аяқталғаннан кейін белгілі болады.
Министрліктің мәліметтеріне сүйенсек, 2022 жылдың 1 тоқсанының қорытындысы бойынша:
- орналасу нысандарына жайғасқан ішкі туристер саны 21,5% артып, 1,13 млн адамды құрады;
- орналасу нысандары 26,3 млрд теңге көлемінде қызмет көрсетті, бұл 2021 жылғы 1 тоқсанмен салыстырғанда 25,7%-ға артық;
- апта сайын Қазақстанға кемінде 11 мың шетелдік турист келеді.
Дүниежүзілік экономикалық форумның мәліметінше, туризмнің жаһандық рейтингінде Қазақстан 2021 жылы 117 елдің арасында 66-орынды иеленді. 2019 жылы 140 елдің ішінде 80-орынға ие болған.
Сонымен бірге еліміз «Баға бойынша бәсекеге қабілеттілік» ( 1-орын), «Туризмнің маусымдылығы» (26-орын), «Табиғи ресурстар» (33-орын), «ЮНЕСКО-ның Дүниежүзілік мәдени мұра объектілерінің саны» (42-орын) көрсеткіштері бойынша жоғары баға алды.
Айта кету керек, өткен жылы Қазақстанда ішкі туристер саны рекордтық деңгейге жетті. Тіркелгендер саны шамамен 7 млн-ды құрады.
