Алдын ала мәлімет бойынша, «МұнайСпецСнабКомпани» ЖШС цементтеу бөлімшесінің жүргізушісі бригада жұмысшыларын орналастыруға арналған дөңгелекті тұрғын көлік — мәдениет кабинасының баспалдақтарымен көтеріліп бара жатқанқанда қаза болған.
«Көтерілу кезінде ол электр сымының зақымдануы салдарынан ток соғып, құрылымның корпусына ток тарады. Оқиға орнына келген жедел медициналық жәрдем қызметкерлері жұмысшының қайтыс болғанын растады. Оқиғаның алдын ала себебі — тұтынушылардың электр қондырғыларын техникалық пайдалану ережелерінің талаптарын бұзу», — делінген хабарламада.
«ӨзенМұнайСервис» ЖШС қызметкердің өліміне қатысты түсінік берді.
«27 қаңтарда «Өзен» кен орнындағы ұңғымалардың бірінде күрделі жөндеудің түнгі ауысымында жазатайым оқиға болып, мердігер компания – «МұнайСпецСнабКомпани» ЖШС жұмысшысы қаза тапты. Қазіргі кезде оқиғаның мән-жайын және себептерін анықтау, алдағы уақытта мұндай жағдайларды алдын алу үшін мемлекеттік еңбек инспециясының жетекшілігімен комиссия жұмыс істеп жатыр. Бұл жағдай жұмыс беруші компания «МұнайСпецСнабКомпани» ЖШС мен «Өзенмұнайсервис» ЖШС басшылығының ерекше бақылауында», — деп хабарлады компания.
Жұмыс беруші компания «МұнайСпецСнабКомпани» ЖШС қаза тапқан жұмысшының отбасына қажетті материалдық көмек көрсететінін мәлімдеді.
