Бәйгеге Алматы, Жамбыл, Жетісу облысынан барлығы 70 ат қатысып, бақтарын сынады. Қаншеңгел ауылынан бастау алған бәйге Қопа ауылында мәресіне жетті.
Нәтижесінде жүлделі 1-орынға Жамбыл ауданы Дегерес ауылының тұрғыны Еркін Айдынның «Білезік» атты сәйгүлігі ие болып, 2 миллион теңгені қанжығасына байлады, ал жүлделі 2-орынға Жамбыл ауданы Жаңақұрылыс ауылының тұрғыны, ардагер атбегі Орынтай Әмірғалиевтің «Бойтұмар» атты тұлпары ие болып, 1 миллион теңгені ұтып алса, 3-орын Жамбыл ауданы Кеңсай ауылының тұрғыны Ержан Маямеровтың «Қарагер» атты сәйгүлігі ие болып, 600 мың теңгені қанжығасына байлады.
Сондай-ақ, осы бәйгеде 100 шақырымдық бәйгеге қатысып, бақ сынаған 4,5,6,7,8,9-орын алған тұлпарлар да бағалы сыйлықтармен марапатталып, сый-құрмет көрді.
Бәйгеден бөлек күрес, қол күрес, ләңгі тебу, арқан тартыс сынды ұлттық ойындардан да жарыстар өтіп, жүлдеге ие болған спортшылар марапатталды.
