«Алматы облыстық білім беру мекемелері қызметкерлерінің жергілікті кәсіптік одағы» қоғамдық бірлестігі Еңбекшіқазақ, Талғар, Жамбыл, Іле және Ұйғыр ауданының ұстаздары 50 пайыздық жеңілдікпен Алакөл жағалауындағы пансионаттарда демалып қайтуға мүмкіндік берді, деп хабарлайды Alataunews.kz ақпарат агенттігі.
Бүгінге дейін мұнда Алматы облысындағы білім ошақтарында еңбек етіп жатқан 500-ден астам мұғалім демалып келді. Қалғаны тамыз айының 14-не дейін келіп тынығады.
«Бұдан бөлек ұстаздардың жазғы демалысын ұйымдастыру мақсатында сауықтыруға арналған шипажайларға 1232 жолдама алдық. Алакөл жағасындағы пансионат пен шипажайларды қосқанда 175 млн. теңгеге жолдама алып, 2132 мұғалім мен жұмысшылардың жазғы демалысын ұйымдастырып жатырмыз», – деді кәсіподақ ұйымы төрағасының орынбасары Қайратбек Асылханов.
Айта кету керек, жолдама 50 пайыздық жеңілдікпен 5 күнге беріледі. Оған ұстаздардың жалақысынан кәсіподаққа аударылатын қаржы есебінен 54 миллион теңге бөлінген.
