Кезекті брифинг тұрғын үйлерде газ баллонын пайдалану және қауіпсіздік шаралары тақырыбына арналды. Мамандар қарапайым ережелерді сақтамаудың әсерінен өрт пайда болатынын алға тартып отыр. Мысалы, биыл Алматы облысында үйлерден қызыл жалын шығуының 455 дерегі тіркелген. Әсерінен 17 адам қаза тапқан. Сондай-ақ көміртегі тотығынан уланып 4 адам көз жұмып, 7 адам түрлі дәрежедегі жарақат алған.
«Алматы облысының аудан, қалаларында газ баллондарын қауіпсіздікке тексеретін 10 жауапты тұлға бар. Өрт және жарылыс болмауы үшін инспекторлар қадағалау жұмыстарын жүргізіп отырады», — деді Мұса Танабаев.
Маман өңірде мамандар тапшылығы бар екенін де жасырмады. Осыған байланысты инспекторлардың біліктілігін арттыруға арнайы курстар енгізілген. Оқудан өткен 249 маманға сертификат табысталған.
«Алда жылыту маусымы келе жатыр. Осыған орай, тұрғындардан жанғыш заттарды пештен кем дегенде жарты метр қашықтықта ұстауды сұраймыз. Үй және құрылыс аймағына іргелес жатқан өртенген қоқыс уақытында тазартылуы тиіс», — деді маман.
