9 айдың ішінде Алматы мен Жетісу облыстарында құрылысы аяқталған жолдардан 481 ақау анықталған. Оның 380-нен астамы республикалық маңызы бар күре жолдар.
Мәселен, Алматы-Екатеринбург бағытындағы тас жолда құрылыстың жүріп жатқанына 3 жылдан астам уақыт өткен. Асфальттың қалыңдығы 12 сантиметр, ал ені 9 метр 75 сантиметрден кем болмауы тиіс. Мамандар бұған дейін дәл осы учаскеде үш бірдей ақаудың анықталғанын айтып отыр.
Жергілікті мекеменің бөлім басшысы Руслан Қашқынбайдың айтуынша, әсіресе техникалық қауіпсіздік сақталмайды.
«Техникалық қауіпсіздік сақталмаған, жұмысшылар каскаларын кимеген жағдайлар бар. Жол-құрылыс материалы дұрыс болмаған жайттар да тіркелді. Кей жолдарда бетондар, арматуралар жабылмаған, асфальт астында төсеніштері болмағаннан бүлініп кеткен», – дейді Руслан Қашқынбай.
Жол сапасын нақты анықтау үшін ұлттық сапа орталығы асфальтты ойып, сынама алады. Алайда сынаманың қай учаскенікі екені құпия сақталып, QR-код арқылы зертханаға тапсырылады.
Биыл Алматы қаласы мен облысы және Жетісу облысынан 2 мың 500 сынама өткізілген. Республикалық маңызы бар трассадан алынған сынаманың 25, қала мен ауыл ішіндегі жолдардан алынғандарының 40 пайызы талапқа сай болмай шыққан.
