БҚО ТЖД баспасөз қызметінен түскен мәліметке қарағанда, оқиға 20 шілде күні кешке қарай Теректі ауданы Жаңаөмір ауылында болды.
«Шаған орта мектебінде оқитын екі жасөспірім ауылдан жарты шақырым жердегі Барбастау өзеніне суға шомылуға келген. Екеуі де жүзе білетін балалар. Сағат 17:35-те олардың біреуі өзеннің ортасына (ұзындығы 50 метр, тереңдігі 5-6 метр) қарай жүзіп барған. Сол кезде аяғы құрысып, суға бата бастаған. Екіншісі құтқарғысы келгенмен, қолынан келмеді. Осылайша, жабдықталмаған жерден суға түскен 2007 жылғы жасөспірім суға батып кетті. Іздестіру жұмыстары нәтижесінде марқұмның денесі сағат 19:00-де табылып, судан шығарылды», — деп хабарлады ведомстводан.
Жыл басынан бері облыста 9 адам суға кетсе, соның төртеуі балалар. Өткен жылы осы мерзімде 20 адам «тілсіз жаудың» құрбаны болған еді. ТЖД суға түсу кезінде қауіпсіздік ережелерін қатаң сақтау керектігін еске салады.
