Шаһардың «Ақсай» ықшам ауданында полиция қызметкерлері таңғы 7-де есірткі қылмысына күдікті көлікті тоқтатқан. Автокөлікті тексеру барысында қара және көк түсті изолентамен оралған полиэтилен байламдары табылып, тәркіленген. Бұл байламдардың ішінде иісі бар ақ түсті ұнтақ зат болған. Сот сараптамасының қорытындысына сәйкес тәркіленген заттар синтетикалық «мефедрон» есірткісі болып шықты.
Алматы қалалық ПД есірткі қылмысына қарсы күрес басқармасының басшысы Ерлан Әлмағамбетов: «1995 жылы туған Д. есімді азамат мінген «Дэу Нексиа» көлігі тоқтатылды. Ал жолаушы 25 жастағы ер адам. Ұсталғандардың үстінен ҚР ҚК-нің 297-бабы бойынша іс қозғалады», — деді ресми мәліметінде.
Алматыдағы Медеу ауданына қарасты, Оспанов көшесінің бойында полицияның арнайы жасағы тағы бір күдікті көлікті тоқтатқан.
«Тойота Камри» көлігін 1990 жылы туған К. есімді азамат басқарған. Көлікті тексеру барысында қара изолентамен оралған 4 полиэтилен байламы табылды және тәркіленді. Ол да «мефедрон» есірткісі. Бұл іске байланысты да тергеу амалдары жүргізіледі», — деді подполковник Әлмағамбетов.
Бұл азаматтар 10 жылдан 15 жылға дейін бас бостандығынан айырылуы мүмкін.
