Қазақстан Республикасы Ғылым және жоғары білім министрлігі, Алматы облысының әкімдігі және «Qonayev Academic Campus» Fund» коммерциялық емес ұйымы өзара ынтымақтастық туралы үшжақты меморандумға қол қойды. Кездесу барысында компания қызметінің тұсаукесері өтті.
Мемлекет басшысының тапсырмасына орай, Қонаев қаласы ғылыми-білім орталығы және студенттер мен жастарды қызықтыратын қалаға айналуы керек.
Жобаны дұрыс іске асыру үшін тараптар өзара мүдделі келесі бағыттар бойынша ынтымақтастық орнатуға ниетті. Мысалы, Алматы облысының әкімдігі қалашық құрылысына және жобаны іске асыруға жеткілікті инженерлік желілер, коммуникация және жобаны жүзеге асыру үшін қажетті басқа да инфрақұрылымы бар жер учаскесін береді.
Қазақстан Республикасы Ғылым және жоғары білім министрлігі тарапынан бакалавриат, магистратура және докторантура (PhD) бағдарламалары бойынша кампус негізінде білім алуға гранттарды, шетелдік студенттердің білім алуына гранттар бөлуді, кампустағы ғылыми-зерттеу, ғылыми-техникалық немесе тәжірибелік-конструкторлық жұмыстарды қаржыландырады, сондай-ақ студенттік қалашықта филиалдар немесе еншілес жоғары оқу орындарын ашу үшін шетелдік жоғары оқу орындарын тартады.
Ал Қонаев атындағы академиялық қалашық қоры тиісті құрылыс үшін қажетті инвестицияларды тартуды, кампус пен жобаның сапалы жүргізілуін қамтамасыз етеді. Индустриалды аймақ негізінде соңғы жобаларды іске асыру бойынша шетелдік серіктестермен және инвесторлармен келіссөздер жүргізеді, кез келген жобаны дұрыс іске асыру үшін қажетті басқа да қолдау мен көмекті ұйымдастырады.
