Алайда, қоғамдық тыңдауға бірде-бір тұрғын келген жоқ. Мұның себебі – жауаптылардың халықты ертерек құлақтандырмауында деп топшыладық. Бас жоспарды жасаушы «Урбостиль» компаниясының ақпаратын тыңдауға тек Қонаев қалалық әкімдігінің мамандары қатысты. Егер халық келмесе мұндай басқосудың пайдасы не? Бұл сұрақтың жауабы жоқ.
2010 жылы Алматы агломерациясын, яғни, Алматы іргесіндегі аудандарды (Қарасай, Талғар, Жамбыл, Еңбекшіқазақ, Іле аудандары мен G4 city, Қонаев қаласы) дамытудың Бас жоспары бекітілген. Бірақ, Алматы облысының екіге бөлінуіне байланысты 2022 жылы сәулет және қала құрылысы басқармасының тапсырмасымен жаңа Жоспар әзірлене бастаған. Ол биыл аяқталып, кейін мемлекеттік сараптамадан өтіп, Үкіметке жолданады. Бұл жоспарды Үкімет бекітеді.
«Урбостиль» компаниясының басшысы Любовь Нысанбаеваның айтуынша, жаңа жобаға байланысты құрылыстың бірінші кезеңі 2030 жылға жоспарланған. Себебі, жоба аясында жасалатын басқа жоспарлар да осы уақытқа сәйкестендірілген. Нәтижесінде агломерацияның даму индикаторы анықталып, қолға алынатын ауқымды жобалардың қайсысына аса мән беру керектігі анықталады. Ал есептік кезең 2025 жылға көзделген.
«Бас жоспарда Алматы агломерациясын дамытудың барлық тетіктері қарастырылған. Мысалы, оның ішінде адамдар өмір сүруге қолайлы орта қалыптастыру, тұрғындардың жыл санап өсуіне байланысты әлеуметтік салалардың дамуы мен тұрғын үйлердің, нысандардың инженерлік желілермен қамтылуы, кәсіпорындар салу арқылы халықты жұмыспен қамту секілді бағыттар бар», – деді маман.
Қазіргі таңда Алматы қаласының 2040 жылға дейінгі Бас жоспары және Қонаев қаласының Бас жоспары бекітілген. Алматынікі 3 млн 200 мың адамға шақталса, Қонаев қаласынікі 200 мың адам тұратындай жасалған. Ал «G4 city-дің» Бас жоспары әлі бекітілген жоқ.
