Бұл туралы өңірдің бас санитар дәрігері Исмаилов Марат өңірлік коммуникациялар қызметі алаңында өткен баспасөз-мәслихатында мәлімдеді.
Маманның айтуынша өткен оқу жылында 9 аудан мектептерінде талаптардың сақталмағаны анықталған.
«Қазіргі тексерістің нәтижесі бойынша да олқылықты түзету жұмыстары жүргізіліп, оқушыларға қолайлы жағдай жасау үшін қызметкерлеріміз қатаң тексеріс жүргізеді. Барлық білім нысандары қыркүйек айына дейін дайын болуы қажет. Егер білім санитарлық талапқа сай болмаса немесе құрылыс уақытылы аяқталмаған жағдайда оқушыларды өзге мектепке уақытша ауыстыруға тура келмек. Бастысы балалардың денсаулығына қауіп төнбеуі шарт», — дейді Марат Исмаилов.
Сонымен қатар баспасөз-мәслихаты барысында маман ата-аналарға оқушылардың денсаулығына теріс әсер ететін факторларға назар салуды сұрады.
Айта кетсек, мектеп сөмкесін сатып алғанда 1 келіден аспауы қажет. Ауыр рюкзакты кию сколиоз, остеохондроз сияқты ауыруларды тудыратынын айтты. Түнде және демалыс күндері гаджеттерді пайдалануға тыйым салу маңызды. Балаларға планшетті күніне 30 минуттан, ал смартфондарды күніне екі сағаттан артық пайдалануға рұқсат етілмейтінін айтты. Оқу жылы басталмас бұрын, ата-аналарға балаларды медициналық тексеруден өткізуге кеңес беріледі.
2022 жылдың көрсеткіші бойынша 153 мыңнан астам оқушы тереңдетілген медициналық тексеруден өткен.
