Үкімет басшысы Әлихан Смайылов шалғай елдімекендерде көшпелі мектеп жәрмеңкелерін ұйымдастыруды тапсырды.
«Барлық білім беру объектілері оқу жылының басталуына 100% дайын болуы тиіс. Оқу-ағарту министрі, өңір әкімдері осы мәселелерді тікелей бақылауға ұстауы қажет. Өңір әкімдіктері көмекке мұқтаж балаларды 100% мемлекеттік қолдау шараларымен қамтамасыз етуі тиіс. Шалғай ауылдарда мектеп жәрмеңкелері мен көшпелі автодүкендерді ұйымдастыру қажет», — деді Әлихан Смайылов Үкімет отырысында.
Одан бөлек, Премьер-Министр құзырлы органдарға қолжетімді бағамен қамтуды тапсырды.
«Әкімдіктер, Оқу-ағарту, Сауда, Индустрия министрліктері мен «Атамекен» палатасы оқу құралдары мен мектеп формасының қолжетімді бағасын қамтамасыз ету мәселелерін пысықтауы тиіс», — дейді ол.
