Жиында аймақ басшысы елдің әлеуметтік-экономикалық дамуында құрылыс саласының рөлі зор екенін атап өтті.
Сонымен қатар ол Қонаев қаласының бас жоспарына тоқталып, болашақта қала заманауи көпфункционалды әкімшілік, қаржылық және мәдени орталыққа айналауы тиіс деп айтты.
«Жаңа әкімшілік мәртебеге ие бола отырып, Қонаев қаласын дамытудың жаңа стратегиясы да анықталды. Қойылған міндеттерді іске асыру үшін жоспарда экономикалық іс-қимыл, тұрғын үй құрылысы, өнеркәсіпті, білім беру, денсаулық сақтау жүйелерін, инженерлік инфрақұрылымды дамыту және қоршаған ортаны қорғау жөніндегі іс-шаралар көрсетілген. Жоспарда қалаға іргелес аумақтарды көркейту үшін қажетті инфрақұрылымның құрылысы ескерілетін болады», — деді облыс әкімі Марат Сұлтанғазиев.
Сондай-ақ, Марат Елеусізұлы барлық жобаларды бірлесе жүзеге асыруға сенімдімін деп, барша құрылыс саласының ардагерлеріне ерекше алғысын білдірді.
Мереке күні мерейі асқандардың қарасы қалың. Облыс әкімінің «Алғыс хаты» құрылыста табанды қызмет еткен 5 адамға берілсе, 12 құрылысшыға Алматы облысы әкімінің «Құрмет Грамотасы» табысталды. Еңбегі еленіп, құрметке бөленгендердің қатарында құрметті сәулетші, Қазақстан қала құрылысшылары одағының президенті Любовь Нысанбаевада бар.
«Алматы облысының әкімі Марат Елеусізұлына Қонаев қаласының бас жоспарын жобалауымызға мүмкіндік бергені үшін жеке ризашылығымды білдіремін. Жауапты істі бізге тапсырғандарыңыз үшін рахмет. Бас жоспарда өңірдің даму кезеңдері қарастырылған. Ауқымды жоспарды үкіметтің бекіткеніне қуаныштымын. Бірлесе атқарған істерміз нәтижелі болсын», — деді Любовь Нысанбаева.
Сондай-ақ, ол сәулет саласына саналы ғұмырын арнағандағы еңбегін елеп-ескерген облыс әкімі Марат Сұлтанғазиевқа «Қазақстан қала құрылысы одағының» арнайы төс белгісін табыс етті.
Аймақ басшысы көрсеткен құрметіне ілтипат білдіріп, алдағы уақыттада өңір дамуы жолында құрылысшылардың қарымды еңбегі қажет екенін тілге тиек етті.
Осылайша, шаһардың шырайлы келбетіне көрік қосып жүрген құрылысшылар лайықты тұғырынан көрінді.
Шара соңы жергілікті өнерпаздардың мереке иелеріне тарту еткен концерттік бағдарламасына ұласты.
