«Бізді бірден үйден шығарып, эвакуациялады. Отбасыда 4 адамбыз, бір кішкентайымыз бар, қызымның аяғы ауыр. Бастысы – бәріміз аманбыз. Ешкім зардап шеккен жоқ. Қала әкімі де оқиға орнында жүрді. Ол 2 апта ішінде барлығын жөндеп береміз, қолдан келгенін аянбай жасаймыз деді. Таңғы 6.00-де бізді «Белый парус» демалыс орнына орналастырған болатын. Мұнда 46 адам уақытша қоныстанды. Мамандар таңғы асымызды, гигиеналық қажетті заттарды әкеп берді. Үйдің мүлкіне қандай зиян келгенін білмейміз. Қазір біраздан соң үйімізді барып көреміз», – деді тұрғын Перизат Жумагулова.
Ал Венера Нептуновна болса, оларды немересі оятқанын айтады.
«Түнгі 2.00-ден кете немерем «өртеніп жатырмыз» — деп, оятты. Ол кезде өрт сөндірушілер, полиция қызметкерлері келіп алған екен. Коммуналды қызметкерлер де тез әрекет етіп, өрт сөндірушілерге көмектесті. Халықты қонақ үйлерге, демалыс орындарына орналастырды. Естуімізше, Есік, Талғар қалаларынан, Өтеген батыр кентінен өрт сөндірушілер де келген», — Венера Нептуновна.
Аяғы ауыр Адина Өнергелді үй өртеніп жатқанда күйеуінің досының үйіне кетіп қалған. Қазіргі таңда пәтеріне қаншалықты зиян келгенін көру үшін оқиға орынына келді.
«Үйде ұйықтап жатқам, көршілер есікті тоқылдатып, оятты. Өзім 1-қабаттағы пәтерде тұрамын. Күйеуіме хабарластым, ол газдан уланып қалма деп, досының үйіне жіберді. Эвакуацияланған адамдар көп. Әзірше, әкімдік бізді ешқайда қоныстандырған жоқ. Бірақ, көмектесеміз деп отыр», — дейді келіншек.
Ал қала әкімі Нұрлан Құматаев үйді қалпына келтіру үшін 4 бригада қызмет ететінін айтты. Оның бірі шатырды, бірі подъездерді, бірі электр жүйесін қалпына келтіреді. Үйді тезірек жөндеп біту үшін бірнеше мердігер компаниялар тартылады.
«Тұрғындар үйлерін келіп көріп жатыр. Қанша шығын келгені әзірше, белгісіз. Ол үшін арнайы мамандар жұмыс жасайды», — деді әкім.
Айта кетейік, «Белый парус» демалыс орнына 46, «Голден Бич» демалыс аймағына 11, «Қаратал» қонақ үйіне 10 адам қоныстандырылды. Қалған тұрғындар туған-туыстарының үйіне кеткен.
Бұған дейін көппәтерлі тұрғын үйдің шатыры жанып кеткенін жазғанбыз.
https://www.alataunews.kz/oqigha/qonaevta-koeppaeterli-uejding-shatyry-zhanyp-ketti/
Посмотреть эту публикацию в Instagram
