Жергілікті тұрғындардың айтуынша, Сағади Талдыбаев Көкжазық ауылдық округінің әкімі қызметіне кіріскелі 20 жылдың жүзі болған. Алайда, тұрғындар осы жылдар ішінде іліп алар жұмыс нәтижесін көрмеген. Ауылдағы интернет, ауыз су, жол, жарық мәселелері әлі өз шешімін таппаған.
«8 маусым күні Ескелді ауданы әкімінің орынбасары, Жетісу облысы әкімінің орынбасары қатысуымен жиын өтті. Жиынды пайдаланып, көкейде жүрген сұрақтарымызды қойдық. Әкім тендер ойнатып жатырмыз деп, әңгімені жылы жапты. Бұл жиынға халық аз жиналды. Себебі, тұрғындардың көбі кездесу болатынын естімеген, естіртпеген де. Ал, жиынға келгендер — әкімнің таныс-тамырлары. Бізге өз уәжімізді толығымен айтуға мүмкіндік бермеді. Ал, интернет мәселесі көтерілгеннен бері 3-4 жыл өтті, әкім тек құрғақ уәде беріп келеді. Көктем-жаз маусымдарында да ауыл тұрғындарымен кездесу өтті. Біз сол кездесуде де жарықтың жиі өшіп қалмауын, балалар ойын алаңын салуды, интернет желісінің жылдамдығын көбейту үшін бір шара қолдануын сұрадық. Нәтиже жоқ. Ауыл әкімі орнынан кетуін талап етеміз», — дейді жергілікті тұрғындар.
Ескелді ауданы әкімдігінің баспасөз қызметі мәліметінше, Сағади Талдыбаев Көкжазық ауылдық округінің әкімі қызметіне екі рет тағайындалған: 1998 — 2012 жылдар аралығы және 2016 жылдан бүгінгі күнге дейін.
«Барлығы жоспарға сәйкес жүріп жатыр, кезең-кезеңімен шешіледі. Демалыс күндері көше жарығының 10 бағанасын ауыстырдық, спорт алаңы салынып жатыр. Иә, интернет мәселесін шешу қиын, өйткені ауылдың географиялық жағдайы мүмкіндік бермейді. Ауыл төменгі жазықта орналасқан. Қазіргі уақытта округтің үш ауылында таза ауыз су бар, мектеп оқушыларын автобуспен мектепке жеткіземіз деп мақтана аламын», — дейді Сағади Талдыбаев.
Ауыл әкімі қызметтен кету-кетпеуі жайлы еш пікір білдірмеді.
Посмотреть эту публикацию в Instagram
