2 жылдан бері егістік алқап пен жайылым жерге жарымай отырған жұрт малды батпаққа жаюға мәжбүр. Өйткені, ауылдың айналасындағы жер түгел жекенің меншігіне өтіп кеткен. Еңбекшіқазақ ауданына қарасты Нұрлы ауылы тұрғындарының талабы бір – жекенің меншігіне кеткен жерлерді жергілікті жұртқа қайтару.
«Жангелді деген кісі 120 гектар жер алған. Жастар ауылда қалсын дейсіздер. Жастар ауылда қайдан қалады, ауылда істейтін жұмыс жоқ. Жермен айналысайық десек, бәрін 400-500 гектарлап 8-ақ адам алып алған. Біз сонда жастар не тірлік қыламыз бұл ауылда?», — дейді ауыл тұрғыны Айдар Нүсіпбеков.
Төрт түліктің арқасында күнелтіп отырған бұл ауылда мыңнан аса халық тұрады. 2 жылдан бері бірінің малы көк қуалап үйлердің жанын жағаласа, өзгелерінікі батпақ пен ну қамысты тебініп жүр. Себебі, жер иелері өз маңына мал түгілі, жан аяғын бастырмайтын көрінеді.
«Мұхит деген кісі бұл жерге негізі ағаш отырғызамын деп алған. Ағаш көріп тұрған жоқсыздар, қазір бәрі егістік. Соя, жоңышқа егіп жатыр. Мына жағының бәрін түгел айналдырып қазып тастаған. Осы ауыл тұрғындарының малы түсіп өліп жатыр. Оған жауапкершілікті ешкім мойнына алып жатқан жоқ. Сондықтан, біздің талап ететініміз осы жерлерді қайтарып алып берсін жергілікті халыққа», — дейді ауыл тұрғыны Есенаман Әбдіқайыров.
Ал Масақ ауылдық округінің әкімі Ертай Нұрмаханов, жергілікті халық заңсыз деп тапқан егістік алқаптарды тексеру біздің құзыретімізге кірмейді, мәселеге аудан әкімдігі мен арнайы комиссия жауап береді деді. Оның айтуынша жайылым жер ауылда жеткілікті.
«Мал жаятын жер жоқ дегенге келіспеймін. Нұрлы ауылы бойынша бізде 4 мың 200 гектар жердің мемлекеттік актісі шығарылған. Енді Еңбекшіқазақ ауданындағы жер комиссиясынан 2800 гектар, қосымша 3200 гектар жердің қорытындысы шығарылды. Сондықтан, мал жаятын жер бар. Нұрлы ауылында негізі 2440 гектар жер болған. Қазір оның 2350 гектар жері пайдалануда», — дейді Ертай Нұрмаханов.
Дегенмен, тұрғындардың мал санын алып, жайылымдық жерге бөлген кезде тек жартысы ғана қамтылып отырғанын әкім мойындаған. Жергілікті халықтың айтуынша жер шенеуніктер немесе солардың жақындары, дос-жарандарына берілген.
Әкімдіктегілерден әбден күдер үзген Нұрлы ауылының тұрғындары облыстың жаңа басшылығына үміт артып отыр. Көпшілігі прокуратура мен сотқа арызданып үлгерген.
