Бұдан бөлек, өңірге қарасты аудандардың бірінде жаппай улану фактісі тіркеліп, 71 адам зардап шеккен. Мамандардың айтуынша, ботулизм секілді сирек кездесетін ауруға шалдыққандар да анықталып жатыр. Былтыр 10-ға тарта адамның диагнозы расталған. Тұрғындардың барлығы консервіленген өнім қолданып, бүлінген тағамнан уланған. Ауру адамнан адамға жұқпайды, десе де, миды зақымдайтын ботулизм таяқшалары аса қауіпті.
«Ботулизмнің алдын алу үшін сапасын куәландыратын құжаты жоқ тағамдарды қолданбаған жөн. Мүмкіндігінше, жабайы сауда орындарына бармаған дұрыс», — деді бақылау департаменті басшысының орынбасары Мүслім Сағадиев.
Сондай-ақ ол көбіне ішек аурулары күн ысығанда өршитінін әрі бұл кезеңде тамақ өнімдерінің ластану қаупінің артатынын айтып, дабыл қағып отыр.
«Өткен жылы Алматы облысында 138 жағдай анықталды. Олардың 121-і балалар. Жаз мезгілінде қауын-қарбыз шығады. Сондықтан тұрғындарға күн астында қалған және күмән тудыратын, лас жерлерден жеміс-жидек сатып алмауға кеңес береміз. Біздің департамент қолданыстағы заңға сәйкес, кәсіпкерлерді жөнсіз тексере алмайды. Тек тұрғындардан шағым түсіп, белгілі бір ауру ушықса ғана тексеріс жүргізе аламыз», — деді Мүслім Сағадиев.
Брифинг соңында мамандар қарапайым тазалық ережелерін сақтауға кеңес берді.
