Жиында облыстың дамуына кедергі келтіретін әрі тез арада шешілуі тиіс түйіткілдер талқыланды.
«Туризмнің жетекші қозғаушысының бірі – Алматы тау кластері. Бұл ретте тау шаңғысы кластері аумағында инженерлік инфрақұрылым құру қажеттілігі туындайды. Осыған байланысты, мемлекеттік ұлттық табиғи парктер аумағындағы туризм объектілеріндегі инженерлік және жол инфрақұрылымы мәселелері бойынша қолданыстағы заңнамаға өзгерістер енгізу мәселесін қарастыруды сұраймын», — деді жиында облыс әкімі Марат Сұлтанғазиев.
Сонымен қатар ол Сенат Спикеріне тозығы жеткен кәріз-тазарту құрылыстарының мәселесін де жеткізді.
«Облыста кәріз желілерінің ұзындығы 172 км, желілердің тозуы 80%-дан асады. Сондай-ақ Алматы қаласының тазарту құрылыстары Іле ауданында орналасқан. Тазарту құрылыстарынан, сарқынды сулардан және лай алаңдарынан жағымсыз иіс облыстағы 3 ауылдық округтің аумағына таралады. Жоғарыда айтылғандардың негізінде халық үшін әлеуметтік маңызы бар мәселені шешуге жәрдем көрсетуіңізді сұраймын», — деді өңір басшысы.
Бұдан бөлек, Марат Сұлтанғазиев «G4City» жобасының жекелеген аумағында ерекше құқықтық мәртебені енгізу маңызды мәселе екенін атап өтіп, бастамаға қолдау керектігін сөз етті.
