24 сәуірде Талдықорған қаласының полицейлеріне жергілікті кәсіпкерлердің бірі хабарласып, екі электр самокаты ұрланғанын айтқан. Ер адамның жүзден астам самокаты бар. Оларды тұрғындар қаланың бір нүктесінен екінші нүктесіне жету үшін жалға алады. Транспорттың әрқайсысында JPS және төлем жасалатын арнайы бағдарлама орнатылған.
«Самокаттар қаланың әр жерінде ұрланған. Келтірілген залал 850 мың теңгені құрады. Жедел қызметкерлер мен патрульдік полицейлер қолды болған көлікті бірнеше сағатта тауып, заңды иесіне қайтарды. Күдікті ретінде 34 және 42 жастағы екі әйел ұсталды. Олардың бірі облыс орталығында, екіншісі жақын орналасқан елді мекенде тұрады», – делінген Жетісу облыстық Полиция департаменті баспасөз қызметінің хабарламасында.
Аталған факті бойынша ҚР Қылмыстық кодексінің 188-бабымен (Ұрлық) тергеу басталды. Ұсталғандарға қатысты «келу туралы міндеттеме» бұлтартпау шарасы таңдалды.
