Алматы облысы Іле ауданы Казцик ауылында 6 балалы жалғызбасты ана Нелли Петрова бұған дейін көпшіліктен көмек сұраған еді. Оның кәмелетке толмаған 6 баласы бар. Ең үлкені 14, ең кішісі 2 жаста. Көпбалалы ана жұмыс істемейді, өйткені кішкентай балаларын тастайтын жер жоқ. Балабақшаға орналастырайын десе, бүлдіршіндердің киерге киімі жоқ.
«Әу баста бәрі жақсы болды. Маған қоғамдық қор көмектесіп, осы үйді алып берді. Көпбалалы ана ретінде алғысым шексіз. Өкініштісі, осы үйге көшіп келгелі проблема көбейді. Жаңа үйімізді жөндеу үшін 1 миллион теңге кредит алдым», — дейді Нелли Петрова.
Дәл сол кезде күйеуі емделемін деп төсек тартып жатып қалады. Үйді жөндеуге алынған 1 миллион теңге отағасын аяғынан тік тұрғызуға жұмсалады.
«Күйеуім денсаулығы түзелген соң араққа салынып кетті. Аузы құрғамайтын болды. Үлкен ұлымды ұрып, балаларға маза бермеді. Қазір сол күйі ішіп кетті, мен жалғыз қалдым», — дейді көпбалалы ана.
Қазіргі күні Нелли Петрова несиеге 70 мың төлейді. Балаларға киім, тамақ алуға жалғызбасты ана тағы бірнеше жерден несие алған. Қазір ол несиелердің біразы төленбей тұр. Нелли Петрованың банктердің біріне 106 мың теңге төленбеген несиесі бар.
Жақында Неллидің үйінде ақ түйенің қарны жарылған күн болды. Азыққа әрең қолы жетіп жүрген отбасына экс-кандидат Шолпан Бертісбаева тоңазытқыш сыйлады. Шолпан Бертісбаеваның айтуынша, мәселе депутат болуда емес, депутат болмасаң да халыққа қызмет етіп, қайырымдылық жасауда.
