Ол Қонаев қалалық Мәдениет үйінде ҮЕҰ өкілдерінің, жергілікті мәслихат депутаттарының, қоғам белсенділерінің қатысуымен кездесу өткізді.
«Негізі бүгінгі жиын брифинг форматында емес, дөңгелек үстелде өтуі керек еді. Өйткені мен әрқайсыңызды тыңдағым келген. Біз үшін сіздердің пікірлеріңіз маңызды. Десе де, қор туралы ашық айтатын боламын, кез келген сұрақтарыңызға жауап беремін», — деді Ләззат Шыңғысбаева.
Жиында осыдан алты ай бұрын құрылған қордың алдағы жоспары, бекітілген бағдарламалары жайлы сөз болды. Қор төрағасының орынбасары білім беру гранттары бағдарламасы бойынша Алматы облысындағы Сүлейман Демирел атындағы университетке 3 грант бөлінетінін, керек болса тағы да грант санын көбейтуге мүмкіндік бар екенін айтты.
Жалпы, қордың грантына үлгерімі жақсы, бірақ оқу ақысын төлеуге мұршасы жетпейтін, көпбалалы, мұқтаж отбасынан шыққан түлектер ие бола алады. Одан бөлек, ЖОО-да оқып жүрген студенттерге 100 грант қарастырылады. Грант мәселесі жөнінде ата-аналардан 1500 өтінім түскен. Басқосуда сондай-ақ спорт, денсаулық сақтау салаларына ерекше көңіл бөлінгені жайлы айтылды.
