Алматы облысындағы тұңғыш рет құрылған авто еріктілер клубының құрылтайшысы – Қонаев қаласының белсенді азаматы Қайрат Азарбай. Жасы 32-де. Қатарластарын да игі бастамаға шақырып, бүгінде 10-нан аса еріктінің басын қосып отыр.
«Мен қиындыққа тап болғанда халық маған көп көмектесті. Сондықтан мен де қайырымдылықпен айналысып, жақсылық жасағым келеді. Барша өңір тұрғындарын волонтер болуға шақырамын!», — деді ерікті Қайрат Азарбай.
Жаңадан іске қосылған ұйым жұмысы қасиетті Рамазан айымен тұспа тұс келіп отыр. Сондықтан еріктілер өңірдегі мұқтаж жанұяларға ауызашар асын таратты. Игі шара жергілікті кәсіпкерлердің қаржылай қолдауы аясында жүзеге асып отыр.
Айта кетерлігі, еріктілер клубының ашылуына облыстық жастар ресурстық орталығы мұрындық болды.
«Бізде бірнеше клуб жұмыс істейді. Кезек авто еріктілерге келіп отыр. Бұл ұйымның негізгі мақсаты – жастарды игі істірмен айналысуға шақыру, қайырымдылық акцияларын көптеп өткізу арқылы әлеуметтік осал топ мүшелеріне қамқорлық таныту болып отыр», — дейді Алматы облыстық жастар ресурстық орталығының басшысы Мақсат Кенешев.
