Инфотурда 8 шет мемлекетінен келген қатысушылар Алматы облысының көркем жерлерін аралады.
Сондай-ақ шарада 2022 жылы Қапшағайға 1 миллионнан астам демалушы келгені және туризмді дамытудың кешенді бағдарламасы бойынша жағалау кеңейтілетіндігі айтылды.
«Әлемнің біраз елін араладым. Көп жердегі негізгі проблема тарихи орындарға, туристік нысандарға бару мәселесі. Яғни, жолдарды жөндеу керек деген сөз. Одан кейін туризм саласында жұмыс істейтіндер міндетті түрде халықаралық тілдерді меңгеруі керек», — деді өз пікірінде Ұлыбританияның туризм саласы бойынша медиаменеджері Ватан Өз.
Форум барысында тұрғындар да өз пікірін білдірді. Мысалы, Валентина Деденконың айтуынша, Қонаев қаласы облыс орталығы болғалы мұнда біраз өзгерістер орын алған.
«Қаламыз облыс орталығы болғалы бері игі өзгерістер көп. Аулалар абаттандырылды. Алдағы уақытта ішінде бассейні мен моншасы, массаж алуға болатын заманауи үлгідегі ғимарат салынса деген тілегіміз бар. Шетелдік және отандық мамандар бас қосқан форумда өңірдегі туризмді дамытудың жолдары айтылды», — деді тұрғын.
Қатысушылар форумда ақпараттық турдың нәтижелерімен, қызмет көрсету мен туризмді жақсарту бойынша да ұсыныстармен бөлісті. Сондай-ақ «B2B» сессиясы өткізіліп, қатысушылар серіктестік жолдарын талқылады.
