Есік қаласындағы Т. Молдағалиев атындағы аудандық Мәдениет үйінің алды мереке мен берекеге ұласты. Ән әуелеп, күй төгілді. Ағайын бір-бірімен құшақ жая амандасып, арқа-жарқа болды.
Жиналған жұртшылық, ең алдымен, облыстық музейлер бірлестігі ұйымдастырған көшпелі көрмені тамашалады.
«Бұл күнді халқымыз Амал мерекесі деп те атайды. Береке-бірлік пен тату тірліктің, қуаныш пен шаттықтың, ақ тілек пен пәк пейілдің ақтарылар күні. Ұлы Абай «Қырдағы ел ойдағы елмен араласып, Күлімдесіп, көрісіп, құшақтасып» деп жырлағандай, көктем шыққан уақытты бабаларымыз «Амал келді, жыл келді» деп ерекше ілтипатпен қарсы алған», — деді салтанатты шарада сөз алған аудан әкімі Алтай Досымбаев.
Сондай-ақ шарада «Жеті қазына» құсбегілер мұражайының қызметкерлері қолына бүркітін қондырып, қасына тазысын ертіп саятшылықты дәріптеді. Игі шара Сүйінбай атындағы облыстық филармония мен «Алатау әуендері» концерттік ұйымы дайындаған ән шашуға ұласты. Мерекені тойлап, мәре-сәре болған тұрғындардың да қуанышында шек жоқ.
«Бұл мейрам жыл сайын қанатын кеңге жайып келеді. Ағайын-туыс, дос-жаран бір-бірімен құшақ жая амандасып, сағынысып, көрісіп жүргенге не жетсін?! Менің ұлтым – қазақ, шешем – орыс, ал әжем – татар. Бір шаңырақ астында тату-тәтті өмір сүріп келеміз. Одан артық қандай бақыт бар?! Жаңа жыл жақсылықтарға толы болсын!», – деді Есіктегі заң колледжінің 3-курс студенті Анна Қалиева.
