Баспасөз қызметінің мәліметтеріне қарағанда, 2023 жылдың 9 наурызы күні сағат 10:30-да Алматы облысының Төтенше жағдайлар департаменті Еңбекшіқазақ ауданында Есік өзені бассейнінің шатқалы арқылы өтетін облыстық маңызы бар «Есік қаласы — Есік өзені» автожолында тау беткейлеріндегі қар жамылғысының тұрақсыз болуына байланысты жеті жерде қар көшкіні өздігінен түскен. Көшкіннің жалпы көлемі — 428,2 текше метр.
Қар көшкіні облыстық маңызы бар «Есік қаласы — Есік өзені» автожолын жауып тастады. Зардап шеккендер мен қирандылар жоқ.
Бұл автожолды тазарту жұмыстары 2023 жылдың 10 наурызында жүргізілді. Көшкін болған жерге «Қазселденқорғау» ММ-нің 3 қызметкері және 1 техникасы, ТЖ департаментінің 1 қызметкері мен 1 техникасы шықты.
Азаматтардың қауіпсіздігі және автокөлік жол қозғалысын тоқтатпау мақсатында Алматы облысының «Жолаушылар көлігі және автомобиль жолдары басқармасы» ММ-нің 2022 жылғы 7 қарашадағы хатына сәйкес «Есік қаласы — Есік өзені» автожолының 7 километрінен 15 километріне дейінгі, сондай-ақ Түрген-Батан ауылы-Асы обсерваториясы автожолының 20 километрінен 41 километріне дейінгі аралық 2023 жылғы 31 наурызға дейін жабық.
Шығыс Қазақстан облысында болған мол жауын-шашын, жел және температуралық фонның көтерілуі қар көшкіні қаупі бар беткейлерден қардың түсу қауіп-қатерін туғызды. «Қазселденқорғау» ШҚ филиалының мамандары көшкіннің өздігінен түсуінің алдын алу мақсатында «Өскемен-Алтай» автожолының 61-62 шақырымында қарды профилактикалық түсірулер жүргізді.
«Автожолға көшкін түсу қаупіне байланысты біз 5 рет жалпы көлемі 23 700 текше метр қар түсірдік. Қар массасы жолды толығымен жауып тастады. Қазавтожол қызметкерлері автожолды тазартып жатыр. Біз өз тарапымыздан қар көшкінінің алдын алу бойынша жұмыс жүргіздік, азаматтарға тауда болған кезде ережелерді сақтауға кеңес береміз. Көшкін қаупі бар ошақтардан өтіп бара жатқанда өте мұқият болуыңыз керек, олардың жанында тоқтамаңыз. Жауын-шашын көп жауған кезде қар көшкінінің түсу қаупі артады», — деді Қазселденқорғау ШҚ филиалының басшысы Омар Дүзгімбаев.
