Биылғы жылы жеке инвестициялар есебінен ауданда 95 жұмыс орнын құрумен 9,4 млрд теңге сомасына үш жоба іске асырылатын болады. Осылайша, жалпы қуаты 13 МВт «Baskan power» ЖШС-нің ГЭС-2, ГЭС-3 құрылысы көзделіп отыр. 7,2 млрд теңге инвестицияланып, 15 жұмыс орны құрылады.
Сондай-ақ, құрамында алтын бар кендерді өндіру және қайта өңдеу бойынша қуаттылығы жылына 183 мың тонна болатын «Aksenger» ЖШС тау-кен металлургия кешенін салу жоспарланған. Бұл жобаға 2,2 млрд теңге салынып, 80 жұмыс орны ашылады.
Ауданның әлеуметтік-экономикалық дамуының негізгі бағыттарын талдай келе, Бейбіт Исабаев өткен жылы Сарқан ауданына тартылған инвестиция көлемі екі есеге артып, шамамен 30 млрд теңгені құрағанын айтты.
Ауданда 19 өнеркәсіптік кәсіпорын жұмыс істейді. Бұдан басқа, облыста «Азия голд» ЖШС дәрілік шөптерді дайындау бойынша жалғыз кәсіпорын бар. Кәсіпорында өткен жылы Ресейге, Германияға, Түркияға және Францияға экспортқа жіберілетін 460 тоннадан астам шикізат дайындалды.
