Жүргізушілер арасында көлік тәртібін арттыру және жол-көлік оқиғаларының санын азайту, сондай-ақ ЖҚЕ бұзушылықтарының алдын алу мақсатында 2023 жылғы 20-24 ақпан аралығында Қонаев қаласының аумағында «Қауіпсіз жол» жедел-профилактикалық іс-шарасы өткізіледі.
«Мұнда жылдамдық режимі, басып озу, қарсы разъезд, маневр жасау, қиылыстар мен жаяу жүргіншілер өткелдерінен өту, жолаушылар мен ауыр салмақты жүктерді тасымалдау, қоғамдық көлік жүргізушілерінің рейстер алдында және жалпы медициналық тексеруден өтуі, қауіпсіздік белдіктері мен балаларды ұстау құрылғыларын пайдалану мәселелеріне ерекше назар аударылады», — деп хабарлады қалалық полиция басқармасы.
Бұдан басқа, Қонаевта 20-28 ақпан аралығында шетелдіктердің елде болуына тиісті бақылауды қамтамасыз ету, криминогендік жағдайды сауықтыру мақсатында «Мигрант» жедел-профилактикалық іс-шарасы болады.
Шараны әкімшілік, криминалдық полиция, жергілікті полиция және көші-қон қызметтері бөлімшелерімен бірге жүргізеді.
