«Қымбатты қазақстандықтар! Мен үйге қайтамын. Сіздер Уимблдонда маған үлкен қолдау көрсеттіңіздер! Мен оны сездім, білдім. Алғыс айтамын! Біз тарихқа бірге ендік, бұл — керемет сезім! Өзім әлі де сене алар емеспін», — деді теннисші.
Федерация: «Елена Рыбакина елордада журналистерге баспасөз мәслихатын өткізіп, жанкүйерлерімен және жас спортшылармен кездеседі», — деп мәлім етті.
Теннисші Уимблдонда жеңісі үшін Қазақстан теннис федерациясы ұсынған жүлде қорынан бас тартқан. Сондай-ақ, ол ақшалай сыйлықтың белгілі бір бөлігін жас теннисшілерді қолдауға және қайырымдылыққа жұмсамақшы.
Еске сала кетейік, жуырда қазақстандық Елена Рыбакина Уимблдон турнирінде тунистік Онс Жаберден басым түсіп, жеңіске жеткен болатын.
