Министрдің айтуынша, жер инспекциясының жұмысын күшейту есебінен былтыр 5,2 млн. га ауыл шаруашылығы жерлері мемлекеттік меншікке қайтарылды. Оның ішінде Алматы облысында 113,6 мың га.
«Бірінші кезекте қайтарылған жерлер ауылдық елді мекендердің жеке ауладағы мал жаю қажеттіліктерін қанағаттандыру үшін қайта бөлінетін болады. Осы бағыттағы жұмыс әлі де жалғасады. Биыл 5 млн. га пайдаланылмаған ауыл шаруашылығы жерлерін қайтару жоспарланып отыр», — деді Ербол Қарашөкеев.
Ауыл шаруашылығы министрінің сөзіне сүйенсек, пайдаға асырылмай жатқан жерді мемлекетке қайтару үшін облыстар мен аудандар бөлінісінде арнайы қайтару жоспары бекітілді.
