«Ой-қарағай» курорттық орнын 60 пайыз дамытып қойдық. Мұнда келушілердің саны да жыл сайын артып барады. Енді қалған 40 пайызды жүзеге асыру үшін мемлекеттік қолдау қажет. Нақтырақ айтқанда, тау шаңғысымен айналысушылар үшін арнайы жабдықтар орнатып, техника сатып алу қажет. Қазіргі таңда инвестор қажетті соманың 25 пайызын ғана өтеп отыр. Шетелдік тәжірибелерде демалыс орындарын дамытуға мемлекет 70 пайыз ақша құйған. Бұл жерді ары қарай дамыту үшін инфрақұрылымды жақсартуымыз қажет. Біз Ақбұлақтан басталған шаңғы жолын Шымбұлаққа дейін ұзартпақ ниеттеміз. Ой-қарағайдың жолы 25 шақырымды құрайды, Ақтас үстіртіне жол жүргізу арқылы бұл жолды 55 шақырымға арттыруды көздеп отырмыз. Жоспарды іске асыру үшін мемлекеттік қолдау арқылы инфрақұрылымды бірізді етуіміз қажет», — деді басқарма басшысы.
Ал облыс әкімі Марат Сұлтанғазиев заң бойынша елді мекендерден тыс жерге инфрақұрылым желілерін тарту мемлекет құзіретінде емес екенін айтты.
«Бұл мәселе облыс көлемінде шешілуі керек. Өңірдегі тау шаңғысы курорттарын дамытуға халықтың да, әкімдіктің де назары ауып отыр. Дегенмен, заң тұрғысынан келгенде елді мекендерден тыс жерде мемлекет қаржысына инфрақұрылым желілері тартылмайды. Әкімдік тарапынан бұл мәселені қарастыратын боламыз», — деді облыс әкімі.
