Визасыз режим талаптарына сәйкес аталған елдің азаматтары шекарадан кірген сәттен бастап 14 күн Қазақстан аумағында еркін жүріп-тұра алады. Іскерлік, жеке мақсаттағы, туристік және басқа да саяхаттарға рұқсат берілген.
Министрлік визасыз режимде Қазақстанда жүрудің жалпы мерзімі әрбір 180 күндік кезеңде 42 күнтізбелік күннен аспауы тиіс екенін атап өтті. Осы шартты бұзған жағдайда шетелдіктер төмендегідей әкімшілік жауапкершілікке тартылады:
- 10-нан 25 АЕК-ке дейін айыппұл;
- 15 тәулікке дейін қамауға алу;
- Қазақстан Республикасынан шығару;
- 5 жылға дейін Қазақстан Республикасына келуге тыйым салу (сот шешімімен).
Сонымен қатар, шетелдік азаматтарға визасыз режимде еңбек және басқа да ақылы қызметпен айналысуға тыйым салынады.
Еске сала кетейік, Қасым-Жомарт Тоқаев Иран Республикасына жасаған жұмыс сапарында Иран азаматтарының Қазақстанда 14 күн визасыз жүріп-тұруына рұқсат берілетінін айтқан болатын.
