Сайттың мәліметінше, соңғы 5 жылда ауасы қатты ластанған қалалар — Астана, Қарағанды, Жезқазған және Теміртау.
Мәселен, Астанада ауаның ластануына себеп болған негізгі факторлар – жылу энергетика кәсіпорындарының шығарындылары.
Сонымен қатар, елорда ауасының сапасына көліктер де теріс әсер етіп отыр.
Қарағандыдағы жағдай да Астанаға ұқсас. Мұнда қыс мезгілінде жылыту компаниялары мен жеке сектордың қалдықтары ауаны ластап жатыр.
Бұған қоса, аталған шаһар аумағында ірі өнеркәсіп орындары орналасқан.
Ал Теміртауда жылдың кез келген мезгілінде ауа ластана береді. Оған қаладағы өнеркәсіп орындары мен металлургиялық кәсіпорындардан бөлінетін зиянды қалдықтар себеп.
Бұл бағыттағы экологиялық мәселелерді шешу үшін инвестиция қажет.
Ұлттық статистика бюросының дерегінше, Қазақстанда 2018-2021 жылдар аралығында қоршаған ортаны қорғауға бағытталған инвестиция көлемі өскен. Алайда, былтыр қаражат көлемі айтарлықтай қысқарған.
Атап айтқанда, өткен жылы қаңтар-желтоқсан аралығында қоршаған ортаны қорғауға бағытталған инвестиция бірден 50,8%-ға төмендеп, 80,6 млрд теңге болды.
Жалпы алғанда, 2018-2022 жылдар аралығында экология мәселесін шешуге бөлінген инвестиция 600 млрд теңгеге жеткен.
