Жедел желі 2020 жылы пандемия кезінде өз жұмысын бастап, облыс екіге бөлінгенге дейін елге қызмет еткен. Араға жарты жылдан астам уақыт салып сенім телефоны қайта қосылды.
2 күн ішінде психолог маманның көмегіне жүгініп, 9 азамат хабарласқан. Нақтырақ айтқанда:
- жасөспірімдер арасындағы буллинг (2 қоңырау);
- құмар ойынға тәуелділік;
- ерте жыныстық қатынасқа түсу мен ерте жүктілік;
- тұрмыстық зорлық-зомбылық;
- ене мен келін арасындағы түсініспеушілік (2 қоңырау);
- сотталғаннан кейін өмірге бейімделу.
Психолог облыстағы жастардың кез келген сұрағына жауап береді. Керек болған жағдайда азаматтарды тұрғылықты мекенжайы бойынша басқа маманға нұсқайды. Өңірдің түкпір-түкпіріндегі психологтар хабарласқан адаммен кездесіп, көмек қолын созады.
Тегін түрде қызмет көрсететін телефон іске қосылғалы көп уақыт өткен жоқ. Сондықтан облыстағы жастардың арасында көп таралған сұрақтар мен мәселелер тізімін жасау әзірше мүмкін емес.
Өмірлік қиын жағдайға тап болған жастар 8 707 878 26 20 нөміріне хабарласуына болады.
