Бұл туралы облыстық төтенше жағдайлар департаментінің баспасөз қызметі мәлім етті.
«20 қаңтар күні сағат 14:53-те Алматы облысы ТЖД кезекші бөлімінің пультіне Ақтас ауылында көппәтерлі тұрғын үйдің пәтерлерінің бірі жанып жатқаны туралы хабарлама келіп түсті. Өрт сөндірушілер оқиға орнына келгенде жалпы ауданы 15 шаршы метр болатын көппәтерлі тұрғын үйдің 5-қабатындағы пәтерлердің бірінде өрт шыққаны анықталды», — делінген хабарламада.
Баспасөз қызметінің мәліметінше, пәтерлерден 4 газ баллоны шығарылды. Құрбандар мен зардап шеккендер жоқ.
Өрт сағат 15:20-да толығымен сөндірілді.
«Өрт сөндіруге 9 маман мен 4 техника жұмылдырылды. Пәтерде от шығуының алдын ала себебі — сұйық отынмен жұмыс істейтін пешті пайдалану кезінде өрт қауіпсіздігі ережелерін бұзу деп болжанып отыр. Бұл көпқабатты үй орталықтандырылған жылыту жүйесіне қосылмаған. Осыған байланысты үй иелері әр пәтерде пеш жағып отыр», — деп жазды ТЖД баспасөзі.
