Көктайғақ кезінде болған жол апатында адамның қаза болуына байланысты Алматы облысының прокуратурасы трассаның жай-күйіне жауап беретін «ҚазАвтоЖолға» қатысты сотқа дейінгі тергеп-тексеруді бастады.
«Алматы облысының прокуратурасы жолдарды пайдалануға және жол қозғалысының қауіпсіздігін қамтамасыз етуге жауапты адамдарға қатысты Қылмыстық Кодекстің 353-бабының 3-бөлігі бойынша сотқа дейінгі тергеп-тексеруді бастады», — делінген прокуратураның хабарламасында.
Прокуратура «Алматы-Шелек-Қорғас» республикалық трассасының 165-ші шақырымында жол апаты салдарынан бір адам қаза табуына байланысты жолға қатысты қызметкерлерді жауапқа тартады.
Бұл апаттың негізгі себебі — көктайғақ және «ҚазАвтоЖол «ҰК» АҚ жолды уақтылы тазаламау, деп хабарлады прокуратура.
«ҚР «Автомобиль жолдары туралы» Заңының 19-бабына сәйкес жол органы мен автомобиль жолдарын басқарушылар қызмет көрсетілетін автомобиль жолдары мен олардағы құрылыстарды көлік құралдарының үздіксіз және қауіпсіз өтуін қамтамасыз ететін жағдайда ұстауға жауапты болады», — делінген хабарламада.
Істі тергеумен Алматы облысы полиция департаментінің тергеу басқармасы айналысады.
Қазіргі уақытта тергеу шаралары жүргізіліп жатыр, деп атап өтті прокуратура.
