27 маусымнан бастап екі облыста «Заңсыз келуші – 2022» іс-шарасы өткізілді. Нәтижесінде 1475 адам әкімшілік жауапкершілікке тартылды.
Алматы облысы Полиция департаментінің баспасөз қызметі хабарлағандай, оның ішінде 1055 шетел азаматы көші-қон саласындағы заңнамасын бұзғаны үшін жауапқа тартылса, 18-і сот шешімімен елден шығарылды.
«Қазақстан Республикасының 393 азаматына айыппұл салынды. Олар шетелдіктер мен азаматтығы жоқ адамдарды жұмысқа заңсыз қабылдаған. Сондай-ақ шетелдік жұмыс күшін тарту ережелерін бұзған 27 жұмыс беруші әкімшілік жауапкершілікке тартылды», — деп мәлімдеді Алматы облысы ПД көші-қон қызметі басқармасының бастығы Елмұрат Нұрсейітов.
Сонымен қатар, өңірлік сот ТМД елдерінен келген 139 азаматтың жеке тұлғаларын анықтау үшін алдын-ала бостандығына шектеу қойды.
Айта кету керек, жыл басынан Алматы мен Жетісу облысы аумағына түрлі мақсаттармен шетелден келген 15 мыңнан аса азамат заң талаптарына сай рұқсат рәсімдеп, заңды жұмыс атқарып жатыр.
